Raadgoob.com
Xaaska madaxweynaha Maraykanka oo qalliin gashay
May 15, 2018 - Written by admin

Marwada koobaad ee Maraykanka Melania Trump ayaa gashay qalliin uu Aqalka Cad ku tilmaamay mid kali la xiriira.

Xafiiskeeda ayaa sheegay in qalliinkaas ay fuliyeen dhakhaatiir ka tirsan xarunta caafimaadka ee Walter Reed National Military Medical Center oo ah mid milatari.

Qalliinka ayaa lagu guulaystay mana jiraan wax dhibaato ah oo lagala kulmay, ayay tiri afhayeen u hadashay.

Melania oo 48 jir ah ayaa la filayaa in ay isbitaalka ku sii jirto inta toddobaadkan ka dhiman si ay ugu soo kabato isbitaalkaas oo ku yaalla Bethesda, Maryland.

Donald Trump ayaa Twitterka ku soo qoray in uu ku sii jeedo xaaskiisa si uu u booqdo.

“Marwada koobaad waxay rajaynaysaa in ay caafimaaddo si ay u sii waddo shaqada ay dhammaan carruurta u hayso” ayay tiri Stephanie Grisham oo ah afhayeenka Melania oo war qoraal ah soo saartay.

Toddobaadkii hore ayay Melania billawday ol’ole looga gol leeyahay in carruurta lagu baro ahmiyadda bulshada, dareenka iyo caafimaadka jirka.

COMMENTS
Latest News